Bläck Fööss

Kaffeebud

[LP „Mer han ´nen Deckel“ 1978]

 

Diensdaachs, mettwochs, donnersdaachs,

friedaachs morjens halver zehn,
do kummen se vun d'r Baustell anjerannt.
Schreiner, Pützer, Mürer un de Büggele vun d'r Poss
un sujar dä dicke Schupo vun d'r Eck.

Un dann ston se en d'r Kaffeebud
un schödden sich de Kaffe in d'r Kopp.
Jeder lis in singer Zeidung röm,
jeder deut sich noch e Brütche ren.
Op eimol weed de Schnüss jeschwat,
dä Pützer hät zo vill jesat.
Do han se jlich dä jrößte Zoff. - Hurra!

 

 

"Do Jipsjeseech, do Weihnachtsmann,
du wells Ahnung vun Fooßball han?"
sät do dä Blöh un lach sich halv kapott.
Do schalt sich uch dä Mürer en,
meint: "Hau dem Kääl doch eine ren."
Un klopp däm Blöh sing Zeidung op d'r Kopp
(Frankfurter Alljemeine)

Un su ston se en d'r Kaffeebud
un schüdden sich de Kaffe in d'r Kopp.
Jeder lis in singer Zeidung röm,
jeder deut sich noch e Brütche ren.
Op eimol es d´r Düvel loß
un och d'r Büggel vun der Poss,
dä misch sich jetz mit en un schreit: "Hurra!"

Dat jeit wigger, pass op:

Dä Pützer jo dä is nit dumm
un beech dem Blöh dä Löffel krumm
un schödd im dann dä Kaffe en de Mötz.
Dä Mürer deit jet Milch dobei
un krit jetz für die Sauerei
vom Possmann Zucker hinger de Brell jespritz.
(Schawein)

Die Kaffeemam bröllt: "Jetz es Schluß,
maat ühr Sauerei zo Hus."
Un brengk dem Blöh ne Lappe för sing Mötz.
Die Junge luren sich koot an
un jevven sich so langsam dran,
bes alles widder blängk un sauber bletz.

Un su ston se en d'r Kaffeebud
un kloppen sich dä Kaffe en d'r Kopp.
Bes se sich dann endlich einig sin,
jeder drieht sich noch e Brütche ren.
Die Fröhstöckspaus is jlich am Eng,
die Junge jevven sich de Häng,
"Dann maat et jot bes morje halver zehn."